Dźěl Ludoweho domu zrumowany

wutora, 08. měrca 2022
artikl hódnoćić
(0 )
Dźěl skóncowaneje fasady Běłowodźanskeho Ludoweho domu su minjene dny kedźbliwje zrumowali.  Foto: Constanze Knappowa Dźěl skóncowaneje fasady Běłowodźanskeho Ludoweho domu su minjene dny kedźbliwje zrumowali. Foto: Constanze Knappowa

Běła Woda (CK/SN). Na Běłowodźanskim Ludowym domje so zaso něšto hiba. Nic z ćežkej techniku, ale wobhladniwje z ruku su sobudźěłaćerjo Trjebinskeje firmy dźěl wonkowneje fasady dospołnje skóncowaneje žurle zrumowali. Zbytk wonkowneje fasady na wysokosć přizemja zawěsća nětko z hrjadami wotnutřka, runje tak nabóčne sćěny. Po žadanju pomnikoškitneho zarjada dyrbjachu dźěl murje z woknami zawěsćić, zo móhli pozdźišo wšitko zaso natwarić.

Při wulkim wohenju loni 25. apryla so Ludowy dom chětro wobškodźi. W oktobru je twarska nawodnica města Dorit Baumeister rozłožiła, kak chcedźa dale postupować. Plan předwidźeše, twarske wotpadki zrumować a fasadu wotnutřka stabilizować. Ručež budźe financowanje jasne, móhli firmy započeć, tehdy rěkaše. Město Běła Woda pak dyrbješe za pjenježnym přemosćenjom pytać, dokelž bě hižo loni nazymu wotwidźomne, zo zawěsćernja za twarjenje płaćić nochce.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND