Wojerecy (SN). Financny předewzaćel Carsten Maschmeyer je minjeny pjatk we Wojerecach pobył. 62lětny wotnajmje na wjacore měsacy City-hotel w měsće, zo by w nim ukrainskim ćěkancam přebytk zmóžnjał. Nětko chcyše so wón na městnje wo tuchwilnym połoženju wobhonić. „Mje zajimuje, kak so ludźo w měsće přiwzaja a na kotre wašnje by so jim dale pomhać móhło“, tak Maschmeyer.
W rozmołwje z wyšim měšćanostu Torstenom Rubanom-Zehom (SPD) so wón wo wulkej pomocliwosći wobydlerjow a wo čestnohamtskim skutkowanju na dobro ćěkancow informowaše. Wyši měšćanosta rozprawješe wo přeću za internetnym přistupom ćěkancam, zo móhli kontakt k swojim swójbnym w Ukrainje wudźeržować. Dale přeja sej móžnosće k nawuknjenju němčiny. Wuměnjene za to pak je, zo su registrowani, štož móže hač do tři tydźenje trać.