Tež hdyž je tute zastojnstwo hłownohamtske, njeje wone jednore a njeda so w běhu wosomhodźinskeho dźěłoweho dnja zmištrować. Na to je so Njeswačanski wjesnjanosta Gerd Schuster hižo 20 lět dołho zwučił. Tohodla njewučini jemu ničo, hdyž jemu wobydlerjo za přichodnu hamtsku dobu znowa dowěru wupraja.

Samo na sebi je Gerd Schuster muž měrneje powahi. Je sylneje a zasadźiteje postawy a to spožča jemu za zastojnstwo tola dosć respekta a k tomu sylnu sebjedowěru, štož je jedna z trěbnych kajkosćow za prěnjeho muža gmejny.

Tute zastojnstwo Gerd Schuster hižo z lěta 2001 wukonja. Ze swojim dotalnym skutkowanjom je spokojom a ma lóšt, dale činić. Za móžne skutkowanje w přichodnej hamtskej dobje jako wjesnjanosta ma tójšto dobrych wuchadźišćow a zakładow. Wuspěchi a skutki minjenych lět su za njeho přičiny dosć, so na nowe dźěło wjeselić.