Njebjelčicy (SN/MiR). Hornjołužiska Greenpeace-skupina je w našich kónčinach skerje mało znata. To njezadźiwa, wšako skutkuja w njej předewšěm ludźo ze Žitawy a z wokoliny. Nětko pak su sej woni kónčinu mjez Njebjelčicami a Miłoćicami wotkryli.

Sobotu popołdnju su so woni wo wuměłsku twórbu pólskeje wuměłče Ivony Stypułkowskeje starali, kotruž bě wona we wobłuku LandArt-projekta w oktobrje 2019 stworiła. Blisko něhdyšeho nasypa Njebjelčanskeho spjateho jězora je mandala – mjez zelenymi stwjelcami młódneje trawy pak su čornošěre zornowcowe kamuški lědma hišće spóznać. Mjenowane kamuški tworja figuru kwětki z wjacorymi łopjenjami. Bohata zeleń na tutym městnje pokazuje płódnosć pódy. Tež łopješka na młodych štomikach pokazachu na to, zo je póda dosć płódna. „Smy sej rady sem dojěli“, powěda Bettina Schwoerer, „Tomaš Čornak bě nam, na jednej z našich lońšich akcijow wo Njebjelčanskej gmejnje a jeje zasadźenju za trajnu perspektiwu rozłožował, kotraž ma tež hišće sćěhowacym generacijam intaktny wobswět skićić. Za to so z našim dźěłom na LandArt-projekće dźakujemy.“