Wěcowna diskusija na forumje za wólby wyšeho měšćanosty w NSLDź

Budyšin (SN/bn). Pod hesłom „Quo vadis Budyšin?“ wuhotowaštej dźenik Sächsische Zeitung (SZ) a Němsko-Serbske ludowe dźiwadło diskusijny forum, na kotrymž so wšitcy štyrjo kandidaća lětušich wólbow za zastojnstwo Budyskeho wyšeho měšćanostu najwšelakorišim prašenjam nastupajo přichod sprjewineho města wěnowachu. Nawoda lokalneje redakcije SZ a moderator wčerawšeho zarjadowanja Ulli Schönbach witaše hosći na połnje wobsadźenej žurli dźiwadła, předstaji jim skrótka diskutantow a rozłoži prawidła podijoweje rozmołwy. Tak mějachu kandidaća a kandidatka maksimalnje 60 sekundow chwile, na přihotowane prašenja wotmołwić; za nastorki z publikuma bě jim połdra mjeńšiny k dispoziciji.