Pobrachowacy hłosowanski lisćik w podłožkach za listowe wólby w Kamjencu je k tomu dowjedło, zo předleži wokrjesnej wólbnej nawodnicy Budyskeho wokrjesa pohóršk.

Budyšin/Kamjenc (SN/at). Horca faza do rozsudneho koła wólbow krajneho rady tutu njedźelu we wokrjesu Budyšin traje. Mnozy ludźo su swoje požadane podłožki za listowe wólby dospołnje dóstali. Pola někotrych pak něšto falowaše. „Pola mnje hłosowanski lisćik připołoženy ­njebě“, rozprawja Kamjenčanka Gabi Matschke. Jeje formelne hóršenje město přiwzało njeje. „Ja móžu so starać. Hdyž pak to staršich, tak njehibićiwych potrjechi a woni tohodla wolić njemóža, to bych za zlě měła“, powěda wona.