Wjele ludźi zahrodowu nóc w klóštrje Marijinej hwězdźe wopytało
Pančicy-Kukow (SN/MWj). Něhdźe 1 100 ludźi je sobotu zahrodowu nóc w klóštrje Marijinej hwězdźe w Pančicach-Kukowje wopytało. Wulki dźěl wsy bě z awtami zaparkowany a při kasy klóšterskeje zahrody so sčasami dołhe rynki čakacych ludźi tworjachu. Hišće dlěše rynki běchu tam, hdźež poskićowachu sobudźěłaćerjo Wawrikec cateringoweho swěta jědźe a napoje. Na nje dyrbjachu wopytowarjo zdźěla jara dołho čakać.
Tež městna před jewišćom běchu dospołnje wobsadźene, jako tam jednaćel Křesćansko-socialneho kubłanskeho skutka (CSB) a moderator Peter Neunert zabawny program připowědźi. Jón wuhotowachu spěwarka Lena-Loreen Kürschner, rejwanske studio TANZ3 a Drježdźanske jazzowy duwo Focus. Nimo Aniny Batz hraješe w nim Józef Brězan, kiž je za swojeho schorjeneho bratra Jana krótkodobnje zaskočił. Nimo dalšich znatych spěwow zanjeseštaj wobaj serbski hit „Słónco swěć“. Derje do wječorneho programa hodźeše so wohnjowa show Las Fuegas z Kamjenicy.
