Ptače saki zaso wottwarjene

pjatk, 07. oktobera 2022
artikl hódnoćić
(0 )
Jedyn z njewšědnych ptačkow, kotrež su lětsa při Holešowskim haće popadnyli, bě tónle wódnik (Wasserralle).  Foto: Erik Eckstein Jedyn z njewšědnych ptačkow, kotrež su lětsa při Holešowskim haće popadnyli, bě tónle wódnik (Wasserralle). Foto: Erik Eckstein

Njeswačidło (SN/MWj). Wot meje su ­sobudźěłaćerjo spěchowanskeho towarstwa Njeswačanskeje ptakoškitneje stacije populaciju spěwacych ptačkow při ­Holešowskim haće přeslědźili. Za to nastajichu při haće 16 wulkich sakow, ­kotrež kóždu hodźinu kontrolowachu ­a z nich zapopadnjene ptački wzachu. ­Přepytowali su ptački na jich starobu a na splah. Nimo toho je wuměrichu, ­wopjeršćenichu a na to zaso do swobody pušćichu.

Kaž koordinatorka Cornelia Kobalz z přirodoweje centrale Budyskeho wo­krjesa zdźěli, je so lětsa 791 ptačkow w sakach zapopadnyło. Z nich su 581 prěni raz wopjeršćenili, 210 hižo pjeršćeń ­mějachu. W sakach wuhladachu dohromady 32 rozdźělnych družin. Z 270 razami bě mały rokotak (Teichrohrsänger) najčasćišo zastupjeny. Wosebje wjeselili su so ornitologojo nad dwěmaj wódnikomaj (Wasserralle) a dwěmaj brjohačkomaj (Eisvogel). Prěni raz ­zwěsćichu při tajkim ličenju zahrodneho čowpaka (Gartenbaumläufer), lěsneho čowpaka (Wald­baumläufer), lěsnu lindušku (Baum­pieper) a pólneho cyrlika ­(Feldschwirl).

wozjewjene w: Lokalka
Prošu přizjewće so, chceće-li komentar podać

słowo lěta 2022

nawěšk

nowostki LND