Wolejbulisća Viktorije Worklecy přebywachu wot 21. do 23. oktobra w sakskim Rabenbergu w treningowym lěhwje. Wróćozhladujo na prěnje tři hry sezony 2022/2023 z dobyćom, ale tež poražkomaj, běchu treningowe nadawki jasne: wukmanić so w přiwzaću, pólne wobaranje polěpšić a běhanske puće awtomatizować. Hač na dweju hrajerjow bě prěnje mustwo muži kompletne a trenowaše intensiwnje. Ale nimo sportowych zwučowanjow stejachu tež mjezsobne rozmołwy kaž tež tajke w kruhu cyłeho mustwa na programje. Tež zabawa njepřińdźe bohudźak pře krótko. Na parkeće a z wudźěłanym lóštnym naprašnikom pokaza so najsylniši, najwutrajniši a samo tež najlěpje zdrasćeny hrajer w rjadach mustwa. Tež sobuhrajerja z najbóle chaotiskim hobbyjom běchu wuzwolili. Na kóncu běchu wšitcy z wuslědkom treningoweho kónca tydźenja spokojom. Hižo na přichodnym hrajnym dnju chcedźa Worklečenjo postupy pokazać. Sobotu, 5. nowembra, přijědźetej cyłkaj ST Coswig-Mišno a MSV Budyšin do Worklec. Přihladowarjo smědźa so wot 14 hodźin na napjaty wolejbul wjeselić. Mato Eckert
Sakska klasa mužojo – stafla wuchod