LSV Hory – SJ Chrósćicy II 1:0 (0:0)

Zestawa hosći: Škoda – F. Mark, M. Donat, Zynda, Kola, K. Mark, Dridiger-Šołta, Rätze, Šołta, J. Donat, Liznar

Na prěnjej njedźeli nazymnika poda so Chróšćanska rezerwa na Hory na hru přećiwo třećemu tabulki wokrjesneje ligi. Po wysokej poražce zašły tydźeń w Minakale bě plan hosći so předewšěm na defensiwu koncentrować. Tohodla nastaji trenar Fabian Hejduška pjeć škitarjow. Wot spočatka sem běchu tež hrajne poměry jasnje na trawniku widźeć. Hosćićeljo kontrolowachu bul a hru, tola wukusachu sej zuby na koncentrowanym wustupowanju Chróšćanskeje defensiwy. Prěnje kontery hosći njeběchu wězo strašne dosć, wšako falowaše w ofensiwje podpěra sobuhrajerjow. Domjacy pak dale tłóčachu. Tola wotzamknjenja běchu pak njedokładne, pak je wrotar ­Jakub Škoda wotwobara abo škitarjo wokoło Jonasa Zyndy nohi do puća stajachu. Najstrašniša akcija prěnjeho połčasa bě wólny kop domjacych pjeć metrow před šěsnatku. Direktnu třělwu Škoda runje tak wotwobara a bě potom před přećiwniskimi nadběhowarjemi při bulu.