Trjebinska gmejna dale w ćežkim pjenježnym połoženju

Trjebin (AK/SN). Tak kaž so lěto 2022 w Trjebinskej gmejnje skónči, tak w lěće 2023 dale póńdźe, rjekny komornica ­Dana Piehl na njedawnej wobydlerskej zhromadźiznje. „Pytnjemy wuskutki demografiskeje změny a přesydlenja Miłoraza“, komornica wuzběhny. Hišće spočatk 2000tych lět měješe Trjebin z Miłorazom něhdźe tysac wobydlerjow. 2011 bě jich 970, loni mějachu 820. Aktualna ličba je pod 800. „Budźe-li Miłoraz wopušćeny, zniži so ličba wobydlerjow na 620“, zdźěli wjesnjanosta Waldemar Locke (CDU).

Gmejna dyrbi z tymle wuwićom žiwa być. 2017 dóstachu wot Swobodneho stata Sakskeje hišće 364 000 eurow klu­čowych připokazanjow. Lětsa wučinješe tale suma jenož 134 000 eurow. Dale ­dyrbjachu w zašłosći 1,3 miliony eurow přemysłoweho dawka wróćić a 90 000 eurow financneho wurunanja. Wot zapósłancow zwjazkoweho a krajneho sejma dóstachu runje tak mało podpěry kaž wot sakskeho ministerskeho prezidenta. Hišće 2018 bě Michael Kretschmer (CDU) na wobydlerskej zhromadźiznje w Trje­binje rjekł: „Hdyž je někajki problem, móža mje Trjebinjenjo kóždy čas za­zwonić.“