Slepo (DFG/SN). Po tym zo bě Slepjanska fararka Jadwiga Malinkowa na njedźelnych dopołdnišich kemšach tamniše dźěćetko wužohnowała, poda so wone samsny dźeń hižo na prěnju słužbu. Z přewodnicomaj wopyta Slepjanske dźěćetko wobdźělnikow serbskeho ewangelskeho wosadneho popołdnja. Po dobrym wašnju wotměje so tele zetkanje stajnje na prěnjej adwentnej njedźeli.

Přichwatali běchu wěriwi ze Slepoho, Miłoraza, Noweho Města, Rownoho a Trjebina. Woni słuchachu na rozłožowanja fararki Malinkoweje k stawiznam dźěćetka. Tak spóznaješ Slepjanske na přikład na módrej šnórce, kotruž ma na chribjeće přityknjenu. „To je tak mjenowana měrowa šnórka, kotruž dósta na prěnjej měrowej namši po Prěnjej swětowej wójnje přityknjene“, fararka rozłoži. „To bě w lěće 1918, jako tehdyši farar Handrik na wšěch padnjenych wosady spominaše“, wona doda. Wot Boha požohnowane měješe dźećetko tehdy zbožo do swójbow njesć.