Budyšin (SN/at). Ekumenu třećeho razu mjenowaše Peter-Paul Straube ze zwjazkarstwa Budyšin w zhromadnosći „dialog a zhromadne dźěło ze wšěmi, kotřiž žanej konfesiji njepřisłušeja“. Ekumenu prěnjeho razu rjekny wón k zhromadnemu dźěłu protestantow a katolikow, ­wzajomne česćowanje mjez swětowymi nabožinami tu druheho razu. Z tym twari Straube zawodnje móst k referentej druheho zarjadowanja Budyskich narěčow pjatk wječor w tachantskej cyrkwi, na kotrež bě zwjazkarstwo hromadźe z Ekumeniskim tachantskim wobchodom přeprosyło.

Referent Dirk Neubauer je jako krajny rady Srjedźosakskeho wokrjesa jenički njestronjan, kotryž tuchwilu w Sakskej tele zastojnstwo wukonja. Naležnosć Budyskich rěčow je mjez sobu rěčeć, nic wo druhich. Kak móhło to w komunalnej politice konkretnje wupadać, je Neubauer na přikładźe swojeho postupowanja jako dotalny měšćanosta Augustusburga w Rudnych horinach předstajił. Klučowe słowo rěka „wobdźělenje wobydlerjow“, zhoni wjace hač sto připosłucharjow w zymnej tachantskej cyrkwi.