Wobzamknjenje Budyskeho wokrjesneho sejmika minjenu póndźelu, zo njeměli ludźo ze statusom „ćerpjeneho“ žane integraciske wukony wjace dóstać, runje tak na tymle polu přewšo angažowane towarstwo „Witajće do Budyšina“ porokuje.

Budyšin (SN/at). Nimale 700 ludźi w Budyskim wokrjesu je wupućowanja winowatych. Jich ze wšelakich přičin pak njewotsunu. „Chcedźa wokrjesni radźićeljo AfD a CDU, kotřiž su póndźelu za stop spěchowanja hłosowali, tutym dźěłowu dowolnosć sćazać?“, praša so towarstwo „Witajće do Budyšina“ w nowinskej zdźělence. Wujasnjenju krajneho rady Uda Wićaza (CDU) we wokrjesnym sejmiku, zo sćerpjeni ludźo žanu perspektiwu na dalše přebywanje nimaja, čehoždla jich hižo spěchować njeměli, staji towarstwo konkretny pad napřećo, zo tež hinak dźe. Tak staj mandźelskaj we Wojerecach po 20 lětach w domje za požadarjow azyla status přebywanja dóstałoj a smědźeštaj nětko samo do swójskeho bydlenje zaćahnyć. Dźěłowe městno staj wobaj hižo dlěši čas měłoj. A němčinu staj w kursach nawuknyłoj, kotrež běchu witanske zwjazkarstwa čestnohamtsce poskićili.