Łužiske lodohokejowe liški –

Heilbronske sokoły 5:1 (3:0, 0:0, 2:1)

Tak jasna kaž rezultat hra Liškow přećiwo Heilbronnej njebě. Po poražkomaj přećiwo Ravensburgej pak běše tutón triumf ćim wažniši. Po krótkim wottasanju Liški mócnje zahrachu. Z trochu zbožom so twjerdy gumijowy dźěl k Hunterej Garlentej suny, kiž bjezkompromisnje k 1:0 zatřěli (3.). A stadionowy rěčnik Branko Frischke njebě 1:0 hišće dospołnje připowědźił, to znowa klinkaše. Teemu Henritius połoži rjenje prěki na Louisa Andersa, kiž wrotarja Sokołow Floriana Mnicha hišće wurejowa a zasuny. Cyłych 28 sekundow ležeše mjez 1:0 a 2:0. A Heilbronn? Ći wotedachu hač dotal někotre małe třělwy, bywachu pak přeco sylniši. Marco Haas měješe dobru móžnosć na 1:2 skrótšić, zapali pak swobodnje stejo nimo. Dale wupakowa Hunter Garlent ženijowu akciju. Z kónčkojteho kućika přetwori wón puk do praktisce njemóžneho krótkeho křiža k 3:0 (16.).