ST Babelsberg –

FC Energija Choćebuz 0:1 (0:0)

zestawa Energija Choćebuz: Bethke – Hasse, Slamar, Hildebrandt, Borgmann, Hofmann, Eisenhuth (46. Juckel), Oesterhelweg (75. Geisler), Badu (88. Böhmert), Hottmann, Wähling (46. Abu-Alfa).

sudnik: Michał Neter (Njeswačidło)

přihladowarjow: 4 483

FC Energija je w třećim pospyće na městno jedyn w regionalnej lize zalězła. Wězo njemóžeše dotalny načolnik tabulki Erfurt na zakładźe wotprajenja partije pola Chemije Lipsk načolnu poziciju zakitować, ale FCE čas wuži a nawodnistwo přewza. Tróšku zboža wšak mějachu, kaž wšitcy wobdźěleni po wothwizdanju přispomnichu, přetož Babelsberg bě specielnje w prěnim wotrězku jasnje lěpše mustwo z wulkotnymi šansami. Pozdźišo so hosćo wo wurunanosć postarachu. Dobyćerske wrota na tutym dnju nimale typisce po standardźe nastachu. Wot połlěwa sćahny Jonas Hofmann bul daloko do šěsnatki hosćićelow, hdźež móžeše Jonas Hildebrandt při dołhim stołpje bul bjez zadźěwkow zasunyć (81.).