Štož je so před něšto časom w Budyšinje wo wulku diskusiju postarało, steješe nětko mjenje abo bóle připódla na dnjowym porjedźe Slepjanskeje gmejnskeje rady.
Slepo (CK/SN). Wot 1. meje 2023 smě Slepjanski wjesnjanosta Jörg Funda mandźelstwa stawnisce wěrować. W februaru bě so wón na dwaj dnjej trajacym dalekubłanju wobdźělił a tute ze certifikatom wuspěšnje wotzamknył. Zo móhł młode pory woprawdźe wěrować, bě hišće oficialne powołanje jako stawniski zastojnik za wěrowanja trěbne. To je so nětko na zašłym posedźenju Slepjanskeje gmejnskeje rady stało. Jörg Funda sam je so hłosa wzdał, kaž je z wašnjom, hdyž so wo swójsku naležnosć jedna. Wšitcy tamni radźićeljo pak přihłosowachu, zo ma so wjesnjanosće zastojnstwo z trochu kopolatym pomjenowanjom přenjesć. Zo su wjesnjanosće po wobzamknjenju samo mały kwěćel přepodali, je jeho wočiwidnje překwapiło.
