Wěriwi ze wšitkich serbskich wosadow do Róžanta putnikowali
Róžant (SN/MWj). Kóždolětne putnikowanje serbskich katolskich wěriwych swjatkownu póndźelu do Róžanta je někak tři tysac wěriwych k hnadownemu městnu přićahnyło. Zdźěla z wosadnych wsow, zdźěla tež z dalšich městnow putnikowaše dźesać procesionow, na čole z chorhojemi a družkami, kotrež njesechu postawu maćerje Božeje. Mnozy rjane wjedro wužichu a sej z kolesom do Róžanta dojědźechu, druzy wostajichu awta we wokolnych lěsach stejo a posledni čwak nóžkowachu.
Na putniskej łuce bě wočiwidne, zo bě lětsa wjace kemšerjow hač hewak. Samo wot wołtarnišća trochu zdaleniše wobłuki běchu z wjele putnikami wobsadźene. Hłowny celebrant bě Budyski farar Wito Sćapan. Kemše wobrubił je projektny dźěćacy chór, kiž je loni spěwohru „Z Tobu – Bohu swjećene lěto“ sobu wuhotował. Nawod měješe Měrćin Weclich. Kěrluše přewodźała je kapała Horjany z hosćimi pod nawodom Jurja Hejduški.