Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (10)
Ze swojimi kónčkojtymi wótrymi zubami njemóže kóčka jenož picu rozkusać abo myšku popadnyć, ale so w boju z druhimi zwěrjatami tež zakitować. Pola wjele kóčkow su hač do wysokeje staroby mnohe zuby hišće intaktne. Druhdy wšak so zub raz wotłama abo zubik so zahori. Tež njeznjesliwy zubny kamjeń móže poněčim k zahorjenju dźasnow a w ćežkich padach tež k zajětřenju zuba wjesć.
