Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach ­čitarjam do domu noša. Najwjetši čas tuž našich pilnych roznošowarjow w lětnjej seriji předstajić (14).

Dźensa podamy so do Nuknicy, zo bychmy tamnišeho roznošowarja Serbskich Nowin zeznali. Je drje to jedyn z najmłódšich ze syły wonych, kotřiž so tomule nadawkej wěnuja. 14lětny Syman Wowčer je jón lětsa w januarje přewzał. Z nim podamy so kaž wšědnje nawječor pěši po Nuknicy. Je zajimawe, štož wot młodeho pachoła, kotryž budźe w nowym šulskim lěće šuler 8. lětnika Serbskeje wyšeje šule „Michał Hórnik“ we Worklecach, zhoniš.