Biskopicy/Njebjelčicy (SN/MiR). Biskopičanski Goethowy gymnazij wudźeržuje styki do města Ouidah we Beninje. Zašły tydźeń je wottam delegacija we Łužicy přebywała. Wjeršk zetkanja běše podpisanje šulskeho partnerskeho zrěčenja. „Smy so na partnerstwo na samsnej runinje měrili, kotrež w dobrej mjezsobnej harmoniji namakamy. Tamniši šulerjo wuknu němsce a naši francosce. To je zakład přećelskeje komunikacije“, rjekny Bodo Lehnig, nawoda gymnazija w Biskopicach. Jeho kolega Alfred Kounde, nawoda powšitkownje kubłaceje šule 1 Bertrand d’Agnon w Ouidah zwurazni: „Zwěsćamy, zo maja młodostni samsne zajimy. Začuwamy, zo chcedźa sej woni swět wotkryć. To je za mnje dobry zakład žiweho partnerstwa, z kotrehož změja přichodne generacije prawy wužitk.“