Po poswjećenju wopomnjenskeje tafle za Jurja Słodeńka póndźelu w Radworju je so wčera dalše zarjadowanje na česć wuznamneho narodneho prócowarja w Pančicach-Kukowje wotměło.

Pančicy-Kukow (SN/MWj). Z literarno-hudźbnym wječorom su Domowinska skupina Pančicy-Kukow, chór Lipa a Towarstwo přećelow Smolerjec kniharnje wčera na Jurja Słodeńka składnostnje jeho 150. posmjertnych narodnin spominali. Něhdźe 90 wopytowarjow a sobuskutkowacych z Pančic a wokoliny, ale tež ze zdalenišich kónčin dožiwi runje tak zabawne kaž powučne zarjadowanje.