Nowy Sprjewiny móst: Haj abo ně?

pjatk, 08. septembera 2023
artikl hódnoćić
(0 )
Naćisk Sprjewineho mosta za pěškow a kolesowarjow mjez Schliebenowym parkowanišćom a Budyskim hrodom.  Foto: schlaich bergermann partner Naćisk Sprjewineho mosta za pěškow a kolesowarjow mjez Schliebenowym parkowanišćom a Budyskim hrodom. Foto: schlaich bergermann partner

Budyšin (SN/MiP). Hižo lěta dołho diskutuje Budyšin wo ideji, móst přez Sprjewiny doł wot parkowanišća na Schliebenowej direktnje do Budyskeho stareho města natwarić. W zwisku z financowanjom projekta pak je tute předewzaće dotal zwrěšćiło. Nětko pak wuhlady na pjenjezy ze spěchowanskich srědkow za změnu strukturow nowu dynamiku do planow přinjesu. Lětsa w oktobrje dyrbjała měšćanska rada hišće schwalić, zo hač do nowembra konkretnu próstwu na spěchowanje pola Sakskeje agentury za strukturne wuwiće zapoda. Tuchwilu trochowane kóšty za projekt: 13,5 milionow eurow. Nowy 122 metrow dołhi móst za pěškow a kolesowarjow zmóžnja wobydlerjam a wopytowarjam Budyšina direktny přistup do stareho města – wobchad w nutřkownym měsće so tak cyłkownje zniži, wšako wostanje awto na parkowanišću na Schliebenowej stejo. Tež wikowarjam a gastronomam móhło direktne wodźenje wopytowarstwa do stareho města z wužitkom być. Cyłkowny projekt wšak njewobsteji jenož z natwara filigraneho mosta, ale tež z jeho přizamknjenja dworej Budyskeho hrodu.

wozjewjene w: Łužica
Prošu přizjewće so, chceće-li komentar podać

nowostki LND