Regionalne poskitki požadane

wutora, 12. septembera 2023
artikl hódnoćić
(0 )
Na nazymskich wikach přirody w Stróži pola Hućiny wopytowarjo minjenu sobotu dožiwichu, kak su něhdy z młóćawu a jednorym traktorom žito młóćili.  Foto: Carmen Schumann Na nazymskich wikach přirody w Stróži pola Hućiny wopytowarjo minjenu sobotu dožiwichu, kak su něhdy z młóćawu a jednorym traktorom žito młóćili. Foto: Carmen Schumann

Wulki nawal ludźi na jubilejnych nazymskich wikach přirody

Stróža (CS/SN). W srjedźišću 25. nazymskich wikow přirody na dworje zarjadnistwa biosferoweho rezerwata Hornjołužiska hola a haty w Stróži steješe minjenu sobotu akcija „Mnohotnosć na talerju – regionalne speciality z biosferoweho rezerwata“. Kołowokoło moderneje syčo­młóćawy, stareje młóćawy a traktora typa Lanz, běchu natwarjene stejnišća z poskitkami regionalnych partnerow biosferoweho rezerwata. Mjez druhim zastupjena bě Budyska Frenzlec piwarnja, kotraž swoje Holanske piwo před­staji. Dale prezentowaše so Kubšiski ­pjekar Stefan Richter, kiž je njedawno zastojnstwo wyšeho mištra sakskeho pjekarskeho zjednoćenstwa nastupił. Wón poskićowaše chlěb „Mały čorny“, kiž je ze šampanskej rožku pječeny. Wona ma wobstajnu kwalitu a je rezistentna přećiwo suchoće. Mjez druhim plahuje ju Löhnertec ratarski zawod z Cokowa, w Spytečanskim Rätzec młynje ju předźěłaja. Byrnjež ratarjo dźensa na žnjach modernu syčomłóćawu zasadźeli, demonstrowachu w Stróži, kak su něhdy ratarske mašiny wužiwali.

wozjewjene w: Łužica
Prošu přizjewće so, chceće-li komentar podać

nowostki LND