Konjecy (jb/SN). Party němsko-serbskeho přećelstwa (DSF) je mjez tudyšej młodźinu chětro znata a přiwabja stajnje zaso mnoho hosći. Mjeztym hižo 20 lět wuhotuje ju młodźinski klub Konjecy-Šunow. Tak běchu so tamniši angažowani młodostni tež lětsa zaso wo kreatiwne wuhotowanje městnow k rejowanju, wo ćělne derjeměće a pisany hudźbny poskitk postarali. Wotpowědnje wosebitemu jubilejej přewjedźechu lětušu party pod hesłom „Jězba přez DSF-galaksiju“.

Hižo pjatk móžachu so hosćo na wustup znateje serbskeje hudźbneje skupiny „Holaski“, ke kotrejž słušeja Dónatec bratřa z Chrósćic a Kito Mark z Noweho Łusća, wjeselić. Zahrali su woni wšelke spěwy ze swójskeho repertoira, mjez druhim tež někotre z nowych spěwow, kotrež běchu lětsa hakle nastali. Zdobom pak běchu „Holaski“ tež z mnohostronskimi coverami němskich a jendźelskich titulow publikum cyły wječor derje zabawjeli a k rejam pohnuli.