Namakana bomba w Šunowje je tež susodne Konjecy potrjechiła

Konjecy/Šunow (SN/MiR). Hižo dočasa, prjedy hač bě oficialna informacija dóšła, wědźachu Šunowčenjo a Konječenjo, zo bu na Kurjatec ležownosći w Šunowje bomba namakana. Wšako maja wobydlerjo wobeju wsow zhromadnu whatsapp-skupinu. A po njej je mějićel ležownosće w směrje do Tradowa informaciju šěrił, zo bu při twarskich dźěłach rozbuchadło namakane. Tež Martina Čornakowa, kotraž w Konječanskim młynje bydli, bě po tutym puću wo bombje zhoniła. „Smy z toho wuchadźeli, zo njejsmy z připowědźeneje ewakuacije potrjecheni. Na kóncu pak dyrbjachmy přiwšěm swoje domske wopušćić.“ Wona dojědźe sej z mandźelskim a synom do Tradowa přiwuznym. „Smy dyrbjeli zastojnikam rjec, dokal so podamy.“ Ći, kotřiž njeběchu priwatny schow nadešli, zaměstnichu so w Ralbičanskej sportowni. Předewzaćel Štefan Čornak bě po puću z wulěta domoj. „Jako sym wo ewakuěrowanju słyšał, sym třom swójbam ze Šunowa azyl poskićił. Jedna swójba ze štyrjomi dźěćimi je poskitk přiwzała, druzy njeběchu doma“, tak wón powěda.