Najstarše twarjenje Budyšina wobšěrnje saněrowane

Budyšin (UM/SN). Po wobšěrnym po­nowjenju wočini na tradicije bohata ­wjerina chěžka, po wšěm zdaću najstarše hišće wobstejace twarjenje Budyšina, prěnju adwentnu njedźelu, 3. decembra, wot 11 do 17 hodź. swoje durje. Dalši termin je za 3. adwentnu njedźelu, 17. decembra, předwidźany.

W lěće 2020 běchu wjelelětni podružnicy z wjerineje chěžki, historiskeho rybarskeho domu při Sprjewi, wućahnyli. Na to je Budyska bydlenjotwarska towaršnosć (BWB) twarjenje ze swojeho wobsydstwa měšćanskej wodźerce Gerlind Alius přenajała. „Wona je sej nadawk stajiła, historisku substancu domu zaso wotkryć a do njeho muzej zaměstnić“, rozłoži jednaćelka BWB Kirsten Schönherr. Wopytowarjo móža so po restawrowanju nětko w domje w duchu na jězbu do stawiznow podać a bydlenske a žiwjenske wašnja před sto lětami nazornje dožiwić. Tak su do chěžki historiske špundowanja z cyhelow kaž tež drjewjane sćěny a hrjady znowa zatwarili. BWB je něhdźe 100 000 eurow do rekonstrukcije twarjenja inwestowała.