Z tutym rjadom přinoškow chcemy Wam měsačnje poručić, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.

Nocy bywaja dźeń a zymniše – prěnje zmjerzki a sněh smy hižo měli. W rostlinarni wšak je přeco wo kusk ćoplišo hač wonka na zahrodźe a rostlinki su bóle škitane. Tak móžemy tu tež nětko hišće najwšelakoriše zymske solotwje žnjeć. Wotšćipamy-li je kaž solotwje za šćipanje (Pflücksalat), wostanje tak mjenowana wutroba stejo a solotej móže zaso narosć.