Spěchowanske towarstwo žada sej wot města Budyšina wjac podpěry

Budyšin (SN/MiP). Hižo wospjet apeluja čłonojo Spěchowanskeho towarstwa Budyskeje hwězdarnje na město a proša wo jasnu podpěru. 150lětna, najstarša šulska hwězdarnja Němskeje je wohrožena. Kónc lěta wuběži aktualne wužiwanske zrěčenje z wobsedźerjom, měšćanskim imobilijowym předewzaćom BBB. Nowemu namjetej wotnajenskeho zrěčenja njeje předsydstwo towarstwa přihłosowało – njedosahacych personalnych a financielnych resursow dla (SN rozprawjachu). Wčera popołdnju je so předsyda towarstwa Helmar Brauer w zjawnej hodźinje naprašowanjow před posedźenjom měšćanskeje rady wyšeho měšćanosty Karstena Vogta (CDU) direktnje prašał, hač je město zwólniwe, „swoju zamołwitosć přewzać a hwězdarnju financielnje podpěrować. Wšako wukonjamy za město Budyšin wažny kubłanski nadawk!“ Tež hdyž astronomija jako wučbny předmjet wot lěta 2007 na sakskich šulach hižo njeeksistuje – w fyzice je wona najebać to kruty wobstatk wučbneje maćizny. Wyši měšćanosta wotmołwi, zo je wo situaciji překwapjeny.