Chrósćicy (SN/MWj). 20 lět po podpisanju partnerskeho zrěčenja mjez pólskej gmejnu Leśnica a Chróšćanskej gmejnu su tele zrěčenje minjenu póndźelu w ­Leśnicy ponowili. Za to bě so dźeń do toho pjeć wosobow wopřijaca delegacija z Łužicy do Pólskeje podała. Nimo wjesnjanosty Marka Klimana (CDU) přisłušachu jej zastupowacy wjesnjanosta Jan ­Wjesela, Tadej Cyž, Maćij Brycka a David Robel.

Wopyt zastupjerjow serbskeje gmejny w Pólskej je mjeztym tradicionalny. ­Stajnje krótko do hód sej k swojim partneram dojědu a so tam na wosebitym dohodownym wječoru wobdźěla, Marko Kliman rozprawja. Nimo toho pobychu na hodownych wikach w Opole a w ­podkopkach pola Katowic, kotrež maja charakter swětoweho kulturneho herbstwa.

Nastali su styki do Pólskeje přez Ta­deja Cyža. Před 25 lětami je wón we wobłuku swojeho skutkowanja pola Miłočanskeho Křesćansko-socialneho kubłanskeho skutka pólske ratarstwo modernizować pomhać. Pjeć lět pozdźišo je tehdyši Chróšćanski wjesnjanosta Maćij Brycka kooperaciske zrěčenje sobu podpisał.