Dokelž je silwester lětsa njedźelu, je so předań pyrotechniki hižo dźensa započała. Při tej składnosći zwjazkowa policija warnuje, sej zakazane praskotaki we wukraju kupić.

Budyšin (SN/MWj). Posledni dźeń lěta so bliži. Mnozy zwjazuja z nim silwesterske praskotanje. Runje w namjeznym regionje ludźo składnosć wužiwaja a sej praskotaki w susodnej Pólskej abo Čěskej kupuja. Ale kedźbu, štož kaž normalny praskotak, raketa abo pyrotechniska baterija wupada, móže jara strašna wěc być, zwjazkowa policija w nowinskej zdźělence warnuje. Často mjenujcy njewužiwa so čorny proch, ale hinaša maćizna, kotraž je industrijnemu rozbuchadłu jara podobna. Samo „La bomba“ abo „Dum bum“, kotrež su zdźěla wjele mjeńše hač němske praskadła, móža k ćežkim zranjenjam wjesć.