Po swojimaj nohomaj so derje po swěće hibać – to sej kóždy čłowjek přeje. ­Haaserecy w Budyšinje so mjeztym ­hižo 90 lět jako předewzaćeljo wo to staraja, zo maja ludźo strowej noze.

Budyšin (SN/MiR). Mjeztym w štwórtej generaciji so Budyske předewzaće Haaser wo to stara, zo maja ludźo strowej noze. Aktualny fokus dźěła leži na ortopediskich črijach. Tola započało je so wšitko z tym, zo bě pradźěd Clemensa Haasera črije předawał a sporjedźał. Jeho dźěd Klaus je potom črije zhotowjał, mjez druhim hižo wobuće za ludźi z wosebitymaj nohomaj abo škórnje za křižerjow. Samo z Kulowskich kónčin su sej swój čas k Haaserecom do Budyšina dojěli, zo by jim „knjez Haaser“ črije abo škórnje na měru zhotowił.