Chrósćicy (SN/mb). Załoženski direktor Astrocentruma Łužica Günther Hasinger na naprašowanje dpa zdźěli, zo hižo 15 ludźi za wulkoprojekt změny strukturow dźěła. Lětsa chcedźa hač do 50 dalšich ludźi přistajić. Dołhodobnje změje institucija něhdźe tysac sobudźěłaćerjow, mjez nimi 350 wědomostnikow. Srjedu wot 18.30 hodź. móžeš so w Chróšćanskej „Jednoće“ z planowanym předewzaćom zeznajomić. A to w rjedźe „ŠPIN 2030“ sakskeho ministerstwa za wědomosć, kulturu a turizm. Zastup je darmotny, přizjewjenje njeje trěbne.

Diskutować budu wo štyrjoch temach. Pod hesłom „městna wuknjenja a dobywanja dorosta“ dźe wo to, z kim a hdźe ma so Astrocentrum zrealizować. „Serbsce? Nó wězo!“ – znata kampanja posrědkuje titul diskusije, kak hodźa so kultura a ideje Serbow hišće lěpje do planowanja Astrocentruma zapřijeć. Dalšej temje stej zdobywanje fachowcow wottud a wot druhdźe a wopytowarske centry.