Prěnja njedźela noweho lěta je w Chrósćicach hižo dlěši čas kruty termin za kulturne a dušine dožiwjenje wosebiteho razu, hdyž Chróšćanski cyrkwinski chór do wosadneje cyrkwje přeprošuje. Wčera bě to prěni raz w ponowjenym Božim domje.

Chrósćicy (SN/MWj). Z dwójnym, mócnym a dołho trajacym aplawsom dźakowachu so wopytowarjo hodowneho hudźbneho nyšpora Chróšćanskeho ­cyrkwinskeho chóra wčera w tamnišej cyrkwi za dušine wokřewjenje wosebiteho razu. Jim poskićichu spěwarki a spěwarjo pod nawodom Michała Cyža kaž tež mnozy dalši sobuskutkowacy ­wotměnjaty koncert z chórowymi sadźbami, instrumentalnymi přinoškami a hudźbnej hodownej hru. Tež wopytowarjo sami běchu sobuskutkowacy, wšako zaspěwachu pod přewodom pišćelow tři kěrluše.