Hodownička Budyskich wosadnych z kulturnym programom

Budyšin (CRM/SN). Swoje kóždolětne hodowne popołdnjo zarjadowachu Serbja Budyskeje katolskeje tachantskeje wosady swj. Pětra tež w nowym lěće 2024. Kaž hižo zdawna z dobrej tradiciju, přeprosychu sej na hodowničku na žurlu biskopa Bena z ewangelskimi wěriwymi zaso tež lubych hosći.

Hižo ekumeniski nyšpor w Cyrkwi našeje lubeje Knjenje běše derje wopytany. Hnujace běše mócne zhromadne spěwanje kěrlušow, wuwzatych z katolskeho Wosadnika kaž tež ze Spěwarskich za ewangelskich Serbow, kiž tachantski kantor Kamil M. Kulawik na pišćelach přewodźeše, runje tak kaž modlenje z tachantskim fararjom Witom Sćapanom a superintendentom Krystofom Rummelom.