Prěni raz sorabistiku w planje za wuwiće wysokich šulow zakótwili

Šwikawa (SN/mb). Prěni raz su sorabistiku w planje za wuwiće wysokich šulow w Sakskej wuraznje naspomnili. Po wčerawšim wuradźowanju krajneho knježerstwa w Šwikawje bu tutón nowy plan „2025plus“ wozjewjeny. Mjez wosebitymi zaměrami mjenuja „wjetšu atraktiwitu a widźomnosć sorabistiskeho studija“. Tema hraje sobu w samsnej lize wužadanjow kaž „zaručenje fachowcow“, „dalša digitalizacija“ abo „wudźeržliwe wuwiće“. Naš wječornik chcyše wot rěčnika ministerstwa za wědomosć, Falka Langi, wědźeć, što to konkretnje woznamjenja. Kaž wón zdźěli, je tónle plan ramik za dojednanja wo zaměrach z wysokimi šulemi. Zo pak su naležnosće Serbow hižo w planje knježerstwa za wuwiće wysokich šulow zakótwjene, je nowum.