Šulerjo nowe pukloty podpěrali

štwórtk, 21. měrca 2024
artikl hódnoćić
(0 )
Šulerjo Foucaultoweho gymnazija ze swojej wučerku Ute Hoffmann přepodachu Wojerowskej dźěćacej a młodźinskej farmje symboliski šek we wobjimje 700 eurow za nowe nuklace pukloty.  Foto: Silke Richter Šulerjo Foucaultoweho gymnazija ze swojej wučerku Ute Hoffmann přepodachu Wojerowskej dźěćacej a młodźinskej farmje symboliski šek we wobjimje 700 eurow za nowe nuklace pukloty. Foto: Silke Richter

Wojerecy (SiR/SN). Na Wojerowskej dźěćacej a młodźinskej farmje, kotraž je w nošerstwje Křesćansko-socialneho kubłanskeho skutka, móžeše njedawno 20 nuklow do nowych puklotow přećahnyć. Mjez nimi je wot wotemrěća wohrožena Mišnjanska družina. „Smy sej modernu a wjetšu připrawu hižo dołho přeli“, praji nawoda farmy Klaus Helbig. Do projekta inwestowachu štyricyfrowu sumu pjenjez. Při tym pomhachu mnozy partnerojo, mjez druhim Łužiski center, drogerijowa kupnica „dm“ a Wuchodosakska lutowarnja.

Šulerjo Foucaultoweho gymnazija podpěrachu předewzaće z akciju „Genialnje socialnje“. Je to sakska najwjetša młodźinska solidaritna akcija, při kotrejž so šulerjo na najwšelakorišich polach angažuja a zasłužene pjenjezy za socialne projekty přewostaja. „Běchmy we wšelakich zarjadnišćach a firmach a smy tam sobu dźěłali. Dźěl nadźěłanych pjenjez, dokładnje 700 eurow, přepodachmy farmje“, powěda 15lětna Lea. Wona je na akciskim dnju w hladanskej słužbje dźěłała. Za angažowanu pomoc wšitkich wobdźělenych je Klaus Helbig jara dźakowny.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND