Fachowc na ludowej uniwersiće: Antiserbski nadpad wjeršk serije namocy

Wojerecy (SN/mb). „Hrozna tema, rjana stwa“ – witaše Anna-Maria Bulang, nawodnica politiskeho kubłanja Wojerowskeje ludoweje uniwersity, něhdźe štyrceći zajimcow na hród w starym měsće. W rjedźe „Rozmołwa na hrodźe“ dźěše po měrcowskim zarjadowanju „Israel a Palestina – židowstwo a islam“ z katolskim měšnikom Peterom Paulom Gre­gorom zaso wo łoskoćiwu naležnosć: „Demokratiji njepřećelne struktury w Budyskim wokrjesu“. Referent Christian Schäfer so při tym jara derje wuznawa, wšako dźěła w mobilnym poradźowanskim teamje Kulturneho běrowa Sakskeje we wokrjesomaj Budyšin a Zhorjelc. Nimo toho so wón w regionalnej syći ­trägerverBUNT za demokratisku towaršnosć angažuje a słušeše k organizatoram lětušich wulkich demonstracijow přećiwo prawicarskemu ekstremizmej.