Rakecy (SN/MWj). Wot spočatka róžownika maja w Rakecach nowu fyzioterapeutisku praksu. Załožił je ju z Noweje Wjeski pochadźacy Frank Zarjenk, a to na zawěrno wosebitym městnje, mjenujcy na starym dwórnišću. Tam 31lětny z mandźelskej a dźěsćom, kotremuž so bórze dalše přidruži, bydli. Jeho sotra je před 13 lětami dwórnišćo kupiła a tam tohorunja bydli. „Mamy tu wjele měra a runje tak wjele městna. Mjez naju by­dlenjomaj bě hišće dosć ruma, tak zo sym so rozsudźił, tule swójsku praksu ­załožić“.