W Dźěwinje ma nowy solarny park w kooperaciji z ratarjemi nastać

Dźěwin (AK/SN). Na 61 hektarow wulkej płoninje mjez wjesnej dróhu S 130 a Małym Dźěwinskim pućom chce gmejna Slepo w Dźěwinje nowu fotowoltaikowu připrawu natwarić. Wotpowědny wobtwarjenski plan je nětko zjawnje wupołožiła. Wupołoženje so 9. awgusta kónči. Zajimcy móža sej jón w Slepjanskim gmejnskim zarjedźe w słužbnych časach wot póndźele do štwórtka stajnje wot 8 do 12 hodź. a pjatk wot 8 do 11 hodź. wobhladać. Wobydlerjo smědźa pisomnje znapřećiwjenja předpołožić. Nic sčasom zapodate stejišća pak so njewobkedźbuja. Na to Dźěwinski wjesnjanosta, Sebastian Bertko (njestronjan), njedawno w gmejnskej zdźělence skedźbni.