W prěnim rjedźe su Wětrowčenjo a wobydlerjo Bóšičanskeje gmejny składnosć wužili 650. róčnicu prěnjeho naspomnjenja wjeski Wětrow woswjećić. Ale tež zajimcy z wokolnych wsow su na swjedźenišćo při tamnišim młodźinskim klubje přichwatali.

Wětrow (SN/MiR). Wjes, kotrejž dźensa domoródni Stary Wětrow praja, bě drje hišće starša hač 650 lět. Prawdźepodobnje saha lěto prěnjeho wobsydlenja tuteje městnosće sto do 150 lět dale wróćo. W registru danjow (Zinsregister) klóštra Marijina hwězda w Pančicach pak je Wětrow jako Wytrow w lěće 1374 prěni króć naspomnjeny. Mjeno pochadźa ze serbskeho zapřijeća „wětr“. Wone poćahuje so na połoženje při wětřikojtej wuchodnej skłoninje. Serbski žurnalist, publicist a znajer regionalnych kaž tež nadregionalnych stawiznow a wjelelětny wobydler wjesneho dźěla Wětrow-sydlišćo Manfred Laduš, dopominaše w swojim hodźinskim přednošku na wosebitosće wsy.