Wulět kolegija do Stróže a Łaza
pjatk, 02. awgusta 2024
61
E-Paper: Serbske Nowiny 149
-
wulkosć pisma
Schriftgröße verkleinern
Schrift vergrößern
Něšto dnjow do zahajenja noweho šulskeho lěta přihotuje šulske wjednistwo Kulowskeje wyšeje šule „Korla Awgust Kocor“ zhromadnje z kolegijom wučbu kaž tež zwonkašulske zarjadowanja za přichodne šulske lěto. K tomu słuša ekskursija do blišeje wokoliny. Wčera je sej wučerski kolegij ze sobudźěłaćerjemi kubłanišća do Stróže dojěło. W tamnišej něhdyšej šuli je Korla Awgust Kocor, po kotrymž je Kulowska šula pomjenowana, dźesać lět jako wučer skutkował. W dźensnišim šulskim muzeju zhonichu wot Marlies Konechtoweje na jara nazorne wašnje wo stawiznach tehdyšeje šule. Dale rozprawješe so wo tym, kak běchu wučerjo swój čas wuwučowali a pod kotrymi wuměnjenjemi su dźěći wuknyli. Po tym podachu so do Łaza. Tam jich Günter Wjenk hižo při cyrkwi wočakowaše. Wón předstaji stawizny cyrkwje, skutkowanje Handrija Zejlerja we Łazu kaž tež cyrkwinske žiwjenje we wsy něhdy a dźensa. Na kóncu je kolegina Oksana Adamekowa na pišćelach cyrkwje hrała. Tak skićeše so wulkotny zaćišć wo rjanym zwuku instrumenta. Dźeń je w Herzogec hosćencu we Łazu wuklinčał.
wozjewjene w:
Łužica
Prošu přizjewće so, chceće-li komentar podać
