Radwor (BB/SN). Twarski inženjer Maik Wirrig z Chasowa je nowy zastupowacy wjesnjanosta gmejny Radwor. 48lětny naslěduje Radworčana Pětra Klimana, kiž je tute čestnohamtske zastojnstwo wot kónca 90tych lět wukonjał. Nowa gmejnska rada ma 16 radźićelow, mjez nimi su šesćo nowačcy. W gremiju je sydom maćernorěčnych Serbow. Kaž hižo w zašłej wólbnej periodźe pak stej mjez radźićelemi tež w přichodnych pjeć lětach znowa jenož dwě žonje. Na prěnim posedźenju noweje gmejnskeje rady witachu pjeć zajimowanych wobydlerjow. Telko je so jich na zašłych posedźenjach w přerězku stajnje naličiło. Po spřisahanju do noweho zastojnstwa padnje srjedu wječor hižo prěni rozsud radźićelow. Po krótkej diskusiji woni zasadnje přihłosowachu, zo móhł skótny lěkar Pětr Vicka na kromje Lutobča při puću do Radworja dom twarić. Pod jeho třěchu móhli so konje abo druhi skót po jich lěkowanju někotre dny wustrowić. Jeli so wšitke terminy za dalše dowolnosće dodźerža, móhli so po měnjenju planowarki projekta hižo w nazymje dźěła započeć.