W Njedźichowskim domje generacijow maja wustajeńcu wo inkluziji
Njedźichow (SR/SN). Posměwk Lukasa natykuje. Sympatiski hólčec rěči jara wotewrjeny wo swojej małoróstnosći. Genetiskeho schorjenja dla ma 14lětny hólčec přewulki jazyk, zaćěmnjenej woči a njemóže noze kaž tež ruce prawje zrunać. „Ćělnje mam wšak swoje ćeže, sym pak z nimi wobchadźeć nawuknył. Zo pak ludźo na dróze na mnje wudźěraja – to so mi njelubi. Chcu, zo druzy ze mnu kaž z kóždym druhim strowym čłowjekom wobchadźeja. Wšako sym tež jenož čłowjek“, wón połny emocijow powěda.
Lukas žedźi so za „cyle normalnym žiwjenjom“. Po šuli chcył rady powołanje medijoweho wuhotowarja nawuknyć a po tym dobre přistajenje a tež „dobru“ partnerku za žiwjenje namakać. Druhdy wšak ma tež swoje zrudne wokomiki, dokelž je „hinaši, hač ći druzy“. Tuchwilu pyta za nowymi přećelemi we Wojerecach a wokolinje, dokelž přećeljo-sobušulerjo na tuchwilnej šuli za ćělnje zbrašenych chětro zdaleni bydla. „Štóž chcył mje rady zeznać, njech so w Domje generacijow w Njedźichowje přizjewi“, praji młody Wojerowčan.
