Wojerecy (KD/SN). Hižo lětdźesatki wuwiwa so Łužica: Wot hórnistwa charakterizowana kónčina bywa dale a bóle turistisce wužiwana jězorina. Při tym je stajnje tež wažne, kak akterojo z materialijemi najwšelakorišeho razu wudźeržliwje wobchadźeja. Tohodla chce zaměrowy zwjazk Łužiska jězorina Sakska mjeztym wotstronjene 203 pućniki w formje chorhojčki wodźenskeho systema za kolesowarjow z lěta 2011 znowa wužiwać. Zamołwići su tak mjenowany upcycling-projekt zrodźili, wujasni jednaćel zaměroweho zwjazka Daniel Just. To so derje hodźi, wšako Swobodny stat tuchwilu nowy rozšěrjeny system kolesowanskich pućow SachsenNetz Rad wutwarja.