Wjesnjanosća widźa „wotcuzbnjenje mjez politiskej klasu a ludźimi“

Budyšin (SN/VaŽ/mb). Dramatiske połoženje komunalnych financow je wjesnjanostow a měšćanostow na wčerawšim zetkanju Budyskeho wokrjesa w Sakskim zwjazku městow a gmejnow (SSG) pohnuło, so z alarmowacymi wuprajenjemi na zjawnosć wobroćić. Přirunujo ze situaciju 2019 su wudawki sylnje stupali, najbóle za socialnu podpěru wo 47,4 procenty. Tež stupace kóšty za energiju nošerjow za pěstowarnje wobćežuja. Aktualna přičina za nowinsku konferencu z wulkim nawalom medijow su aktualne jednanja CDU, BSW a SPD wo móžnej koaliciji w Sakskej – zamołwići komunalni politikarjo regiona maja zaćišć, zo wjesne kónčiny dotal přemału rólu hraja.