Wojerecy (KD/SN). Wojerowski wyši měšćanosta Torsten Ruban-Zeh, měšćanosta Kulowa kaž tež wjesnjanosća gmejnow Łuty, Njedźichow, Halštrowska Hola, Wóslink, Łaz a Sprjewiny doł su póndźelu we hłownej straži Wojerowskeje powołanskeje wohnjoweje wobory nowe kooperaciske zrěčenje za mjezsobnu wohnjowobornisku podpěru wobzamknyli. „Nowe zrěčenje naruna dotalne z lěta 2013 a rjaduje kooperaciju mjez powołanskej wohnjowej woboru a dobrowólnymi wohnjowymi woborami při hašenju a druhich woborniskich nadawkach“, praji Benny Bastisch. Wón je fachowy nawoda wotrjada za wohnjowu woboru Wojerowskeho měšćanskeho zarjada. Mjezsobna podpěra je wažna a wužitna, nic jenož hladajo na přidatny personal, kotryž je we wěstych situacijach trěbny, ale tež hladajo na specialnu wobornisku techniku, z kotrejž sej wobory wupomhaja. „Wobydlerjo w komunach maja z tym tež lěpši škit w padźe wohenja abo druhich nuzowych situacijach, měni Benny Bastisch.