Město Budyšin so nadal wo wjace widźomnosće serbšćiny prócuje

Budyšin (SN/VaŽ). Zastupjerjo města běchu wčera připołdnju w Budyskim centrumje po puću, zo bychu pjeć wobchodow swjatočnje z plaketu „Sorbisch? Na klar!“ wuznamjenili. Z tym hódnoća iniciatiwu wikowarjow na dobro spěchowanja serbskeje rěče .

Wot časa nastupa zastojnstwa wyšeho měšćanosty Karstena Vogta (CDU) ma město zaměr, serbsku rěč w zjawnym žiwjenju widźomnišu sčinić. „Za mnje je serbska rěč znamjo jónkrótnosće našeho regiona. Wjeselu so, zo móžemy z tajkej akciju na wuznam tuteje rěče skedźbnjeć. Chcemy, zo so serbšćina we wšědnym wobrazu města, na přikład na dróhach, na jědźnych kartach abo w digitalnych poskitkach města jewi“, Vogt wuzběhny. Tež hdyž sam serbske korjenje nima, zasadźuje so rady za wjace serbskeje kultury, kaž serbskeje rockoweje abo popoweje hudźby w měsće, wón doda.