Kamjenc (SN/MWj). Dokelž Lessingowy muzej w Kamjencu přetwarja, njezměja tam wot přichodneje wutory hižo stajnu wustajeńcu. Kaž muzej w nowinskim wozjewjenju zdźěli, započnu so twarske dźěła 19. meje. Tón dźeń wotměje so w domje w 13.30 hodź. swjatočnosć składnostnje prěnjeho pisomneho naspomnjenja města Kamjenca před 800 lětami. Po tym zahaja twarske dźěła.

Do směra na park ma přitwar nastać. Z tym stworja wuměnjenja za to, zo móža na hornim poschodźe wosebite wustajeńcy na moderne wašnje prezentować. Z přitwarom wutworja nimo toho nowe puće w domje. Zatwarić maja so tež načasne sanitarne rumnosće. Wopytowarjo literarneho muzeja změja z tym lěpše wuměnjenja. Planowane je, muzej we wobłuku 56. Kamjenskich Lessin­gowych dnjow w lěće 2027 znowa wotewrěć.