Jutrowne tradicije a nałožki ze zahoritosću pěstowali

Łužica (SN/CS/BŠe/bn). Syły hosći su jutrowničku při najrjeńšim wjedrje Łužicu wopytali a sej nałožki a tradicije Serbow wotkryli. Wjeršk běchu bjezdwěla dźewjeć procesionow křižerjow mjez Budyšinom, Kamjencom a Wojerecami. Dohromady 1 376 křižerjow je lětsa jutrowne poselstwo wozjewiło. Cyłkownje bě jich štyri křižerjow mjenje hač loni. Kaž z wšelakich rozprawow wuchadźa, su sej tysacy ludźi procesiony wobhladali a běchu wo hnujacej tradiciji zahorjeni.

Jutrowne jěchanje tež lětsa we Wostrowcu pola Zhorjelca přewjedźechu. Tam jěchachu mužojo wot farskeje cyrkwje přez pola k cistercienskemu klóštrej Marijiny doł a wo dobry rozrost symješkow prošachu. Lětsa bě tomu 396. króć. Mjez jěcharjemi bě Zhorjelski krajny rada dr. Stephan Meyer (CDU). Organizaciju staj prěni raz Sebastian Bergmann a Robert Vallentin přewzałoj.